4 ka trabahante sa kan-anan gipadakop

CEBU, Philippines -  Gitanggong sa detention cell sa Fuente Police Station ang upat ka trabahante sa usa ka seafoods restaurant human nasakpan sa ilang agawon nga sekretong nipagawas ug nibaligya sa 12 kilos nga panga sa tuna.  Ang reklamante naila nga si Ria Alcover, 29, tag- iya sa usa kan-anan sa Orchid St., Capitol Site, dakbayan sa Sugbo kinsa mitawag og polis human mitug-an ang ubang trabahante sa gibuhat sa ilang kauban.

Ang mga nasikop mao sila si Melvin Je Perez, 27, taga Guilhulngan, Negros Oriental kinsa pito ka tuig na nga stockman; Marcelino Sueles, 22, taga San Jose, Dinagat Island kinsa duha ka tuig na nga helper/butcher; Melvin Padillo, 35, taga Kamputhaw, dakbayan sa Sugbo kinsa tulo ka buwan pa lang nga dish washer ug Manuel Mondejar, 22, nga delivery man.

Reklamo sa tag-iya sa maong restaurant mao nga nagkonsabo ang mga dinakpan sa pagpalusot ug baligya sa mga tuna.

Matud ni PO1 Gerald Cab sa Fuente Police Station nga nahinabi sa Banat News nga nakuha gikan sa posesyon sa mga dinakpan ang 12 ka kilos nga “tuna panga” nga kantidad P3,000 nga paingon na untang ibaligya sa mga suspek.

Gikatakdang pasakaan og kaso sa pagpangawat ang mga suspetsado karong adlawa. (BANAT NEWS)