Amahan naghikog

CEBU, Philippines - Wala na’y kinabuhi samtang nagbitay ang usa ka 54-anyos nga lalaki sulod sa lawak nga iyang gipuy-an sa San Jose St. Poblacion 1, dakbayan sa Carcar kagahapon sa buntag.

Si Cristino Dacullo Tarazona, 54, giingong naghikog gamit ang nylon nga pisi nga gihigot sa liog ug ang pikas tumoy gihigot sa kisame.

Gidali sa pagdala sa Carcar Provincial Hospital si Tarazona apan gideklarar na kini nga dead on arrival sa doktor.

Nakuha sa crime scene sa kapulisan ang usa ka suicide note nga gibutang sa ibabaw sa picture frame sa iyang asawa nga anaa sa higdaanan.

Sa imbestigasyon ni PO1 Francisco Saberon nasuta nga ang suicide note ni Tarazona nangayo og pasaylo sa iyang asawa nga si Teng nga nagtrabaho sa gawas sa nasud ug sa iyang anak nga ginganlan og Day Gel nga nagtungha sa dakbayan sa Sugbo.

“Pasayloa intawon ko sa akong sala Day Teng, Day Gel mopahuway na ko human sa imong pagskwela para di ka maglisod parihas nako. Dela tabangi ko nga pasayloon ko ni Eting. Si Angel Dela pakan-a onya og muoli. Day Gel ang tindahan ako nang ibilin nimo pasayloa-a ko ninyong tanan,” saysay pa sa suicide note ni Tarazona.

Wala pa nasubay sa kapolisan kung unsa ang nahimong sala ni Tarazona ngadto sa ilang mga anak apan sumala pa sa kapolisan nga daw sa dili na kini gusto nga magsalig pa sa iyang mga anak nga moatiman kaniya.

Gipasabot sab ni PO1 Saberon nga sa nakuha nila nga impormasyon nga posibleng pinansyal nga problema ang hinungdan sa paghikog patay ni Tarazona sanglit wala kini nakaaway ug wala usab kini gitug-an nga gihambin nga balati-an.

Matud sa bayaw nga babaye ni Tarazona nga ikatulo na nga higayo’ng misuway sa paghikog si Tarazona apan wala madayun tungod kay pirme kining masakpan. (/GMR)(BANAT NEWS)