Hapon, Katsila gikawatan
CEBU, Philippines - Nabiktima sa pagpangawat ug pagpanulis ang duha ka langyaw sa niaging adlaw sa dakbayan sa Sugbo.
Mireklamo sa Theft and Robbery Section sa Cebu City Police Office (CCPO) ang usa ka Hapon human gitulis sa tulo ka lalaki sa sitio Bato, Ermita.
Ang biktima nailhan nga si Ohashi Yusuke, 22, ulitawo, taga Shimazato Ogaki, Japan ug kasamtangang nagpuyo sa Urgello, dakbayan sa Sugbo.
Naglakaw alas-7 sa gabii ang biktima dihang kalit lang tulo ka lalaki ang miduol ug ang usa mition og ice pick dayon deklarar og tulis. Nakuha sa mga tulisan ang dalang back pack, laptop, Nixon camera, iPod, electronic dictionary, ug kwarta nga P900.
Samtang usa usab ka Katsila ang gikawatan sa iyang mga mahalong gamit sulod sa iyang gipuy-an sa Guadalupe, dakbayan sa Sugbo.
Ang biktima nailhan nga si David Angel Sanchez Arranz, 26, taga Tres Picos, Galapagas, Madrid, Spain.
Gitudlo nga suspetsado kinsa nasikop sa kapolisan mao si Jocel Gabutero, 22, construction worker ug nagpuyo sa Banawa, dakbayan sa Sugbo. Nabawi ang mga gamit sa langyaw nga naglakip sa Packard netbook ug portable play station. - /GMR) (BANAT NEWS)
- Latest
