PWD Week gibuksan, wheelchairs gipanghatag

CEBU, Philippines - Gibuksan ang kalihukan sa National Disability Prevention and Rehabilitation Week sa dakbayan sa Mandaue pinaagi sa paghatag sa siyam ka wheelchairs sa persons with disabilities (PWDs) sa Sports and Cultural Complex human sa parade.

Dugang wheelchairs usab ang gitugyan ngadto sa mga buhatan sa Human Resource Management Office (HRMO), City Sport and Cultural Complex, ug Mandaue City College Technological and Entrepreneurial Skills Training Center  nga gitagana alang sa mga PWD nila nga mga kliyente.

Ang 3,000 kapin ka mga PWDs sa dakbayan maoy mitambong sa nagkadaiyang kalihukan nga molungtad sulod sa usa ka semana.

Naglakip sa mga kalihokan mao ang livelihood exhibits ug indigay sa paugnat sa kusog nga gitawag og Paralympics.

Si Michael Pielago, focal person sa PWD sa dakbayan, miingon nga ang 3,000 kapin nga narehistro nga PWDs sa dakbayan hatagan og igong kasayuran labot sa mga tumong ug tinguha sa kagamhanan sa paghatag kanila og mga kaayuhan.

Gipasabot niya nga ang mga adunay kabilinggan sa panglawas nga molupyo sa 27 ka barangay sa dakbayan sa Mandaue gibahig ngadto sa nagkalainlaing kahugpungan nga naglakip sa buta ug amang nga kababayen-an.

Ang lalawigan sa Sugbo nagsaulog usab sa PWD Month karong buwana diin ang pagbukas sa mga kalihukan gihimo niadtong Hulyo 4. - /GMR) (BANAT NEWS)