Terorismo gibantayan
CEBU, Philippines - Wala’y kompiyansa ang kapolisan sa dakbayan sa Sugbo ug padayon kining nag-monitor ug nakig-alayon sa ubang yunit aron maseguro nga luwas sa hulga sa terorismo.
Kini ang gibutyag ni Supt. Romeo Santander, hepe sa City Intelligence Branch (CIB) sa Cebu City Police Office (CCPO) nga nahinabi sa mga tigbalita.
Matud pa ni Santander nga nagpadayon karon ang ilang paghipos og mga impormasyon ilabi na gikan sa Intelligence Unit sa Mindanao. Sumala pa ni Santander nga tanang makuha nga impormasyon ila gyud i-validate kung unsa ka tinuod.
Apil sab sa ilang gihimo ang pagpakig-alayon sa Muslim community sa Sugbo gumikan kay nagtoo si Santander nga dili mosugot ang mga Muslim nga magubot ang lugar.
Matud niya nga adunay maayong relasyon ang kapolisan ug ang Muslim community sa Sugbo.
Apan gipanawagan sa kapolisan ang publiko nga magmabinantayon sa tanang panahon aron daling mapakgang ang mga dautang plano sa pipila ka grupo. Gi-alerto ang kapolisan sa dakbayan sa Davao human sa nadawat nga tawag ni Mayor Rodrigo Duterte gikan ni Presidente Noynoy Aquino kabahin sa giingong target sa mga terorista ang dakbayan.
Gitumbok nga usa ka Abdul Basit Usman nga “bomb maker” sa grupong Abu Sayyaf ug konektado sa grupong Al Qaeda ang nagplano nga mohimo og kagubot sa dakbayan sa Davao ug ubang lugar sa nasud. (BANAT NEWS)
- Latest
