“Nagpabuto” nga polis wa magpa-paraffin test

CEBU, Philippines - Wala mopaubos sa paraffin testing ang pulis nga si PO3 Neri Cahimat,  ang pulis sa Mabolo nga gipasanginlan nga nagpabuto og armas dihang nag-inom sa gawas sa usa ka restobar sa Mango Avenue ning dakbayan.

Kini ang gipasabot ni Chief Inspector Wildemar Tiu ang hepe sa Fuente Police Station nga nahinabi sa mga tigbalita.

Matud pa ni Tiu nga ang kasakit sa maong proseso maoy gihimong rason ni Cahimat kun nganong dili kini buot mopaubos sa paraffin test. Gipasabot sa hepe sa Fuente Police Station nga kadto ra g’yud ang paagi aron mahibaw-an kung tinuoray ba nga nagpabuto kini og armas.

Apan sumala pa ni Senior Superintendent Nestor Sator ang hepe sa PNP Crime Laboratory nga nakabutang sa Philippine National Police Operational Procedure nga ang tanang paagi buhaton sa kapolisan aron makakuha og legal nga ebidensya aron lang pagsulbad sa usa ka kremin.

Gipasabot ni Sator nga bisan og wala nakabutang ang terminong paraffin testing, apan mahulog na kini nga naapil sa giingon nga tanan nga ebidensya.

Apan gipasabot sab niini nga dili sab gayud nila mapugos ang bisan kinsa kung dili magpaubos sa maong proseso.

Gipasabot  ni Tiu nga usa diay ka super .38 pistol ang gi-surrender ni Cahimat sa kapulisan sa Fuente police nga gi-isyu siyudad sa Sugbo kaniadto sa mga polis nga walay armas.

Kasong less grave misconduct ang atubangon nga kasong administratiba ni Cahimat nga ipaubos sa imbestigasyon diin tulo na lang unta ka tuig ang nahibilin sa iyang serbisyo sa dili pa kini moretiro. (BANAT NEWS)