Nagresponde og tulis, naghingos maoy nadakpan

CEBU, Philippines - Maoy nasikop sa kapolisan ang lima ka tawo nga naggamit og ilegal nga drugas sa dihang nitubag sila og alarma sa tulis sa Citi-Center, Kamagayan, dakbayan sa Sugbo niadtong Huwebes sa buntag.

Giila ang mga suspetsado nga sila si Gerwin Albia, 30, taga Sambag II, Daniel Paez Mondigo, 32, Wowie Gabutan Singson, 20, ug Chonalyn Cho Flores, 22, taga Kamagayan, ug Raul Valencia Lu, 46, taga Kinalumsan, dakbayan sa Lapu-Lapu.

Matud ni SPO2 Francisco Parilla sa Pari-an Police Station nga wala nila giplano ang pagsikop sa mga suspetsado tungod kay nipahigayon sila og follow-up operation sa usa ka robbery alarm.

Sa ilang pagsuhid sa lugar, ilang nakit-an ang lima ka suspetsado sa usa ka payag dala ang gamit paghingos sa ilegal nga drugas hinungdan  nga dali nila kining gisikop.

Nakuha sa kapolisan gikan sa lima ang duha ka disposable syringe, duha ka wala’y sulod nga ampoule sa Nubain, tulo ka disposable lighters, usa ka gamay nga aluminum tin foil, duha ka improvised nga glass tooter, ug usa ka plastic tube .

Kasamtangang gitanggong ang lima sa Pari-an Police Station samtang giandam ang ipasakang kaso batok kanila. (/GMR)(BANAT NEWS)