Bike lanes gisuportahan

CEBU, Philippines - Suportado sa City Traffic Office Management (CITOM), Department of Public Works and Highways (DPWH), ug Department of Transportation and Communications (DOTC) ang giduso nga ordinansa mahitungod sa pagbutang og bike lanes sa mga pinili nga dalan sa siyudad sa Sugbo.

Si Engr. Fernado Cruz, district engineer sa DPWH miingon nga una nilang butangan og bike lanes ang SRP kay lapad ang dalan niini ug andam usab silang magbutang og susamang lanes sa pinili nga mga dalan sa siyudad.

Ang mga karsada nga lapad ra ang ilang butangan og lanes sama sa Osmeña boulevard, Gorordo Avenue padung Marco Polo hangtod sa Trans-Central Highway, ug Archbishop Reyes Avenue padung Canduman ug ang CITOM maoy modumala sa  mga lanes.

Matud ni Paul Villarete, kinsa maoy DOTC representative nga andam sila mosuporta  sa ordinansa apan kinahanglan tun-an kini pag-ayo.

Ang bike lanes nga ibutang di lang simpleng bike lanes apan kinahanglan usa kini ka protective bike lanes.

Kung si Atty. Rafael Yap ang pangulo sa CITOM ang pangutan-on buot niya nga tahuron sa mga motorista ang maong lanes.

Matud ni Joel Lee, presidente sa Tindak Cebu, nga kung mapasa ang ordinansa dako kining pabor alang kanila tungod kay gawas nga pang-ehersisyo, eco-friendly usab kini. (BANAT NEWS)