Sikyu patay sa bangga, laing usa napusilan
CEBU, Philippines - Patay ang usa ka guwardiya human aksidenteng nabangga sa gutter sa karsada pasado alas 3 sa hapon niadtong Domingo sa Veterans Drive, Maracas, Lahug, dakbayan sa Sugbo.
Giila ang biktima nga si Ricardo Carbonilla, 58, samtang angol ang iyang backrider nga asawa nga si Evelyn, nagpuyo sa Lower Nivel Hills, Lahug.
Sa pasiunang imbestigasyon ni SPO1 Anthony Deligero sa Traffic Division nasayran nga samtang paingon sa JY Square, Gorordo Avenue ang biktima, kalit lang nawad-an og kontrol sa iyang gisakyang motorsiklo ang biktima ug nabunal sa kilid sa karsada.
Dali pa untang gidala sa Cebu City Medical Center (CCMC) ang duha apan nakabsan gyud sa iyang kinabuhi si Ricardo.
Samtang laing guwardiya samdan human pusila sa kawani sa kompaniya nga iyang gialagaran sa Sitio Radar, Babag, dakbayan sa Lapu-Lapu kagahapon sa kadlawon. Ang biktima mao si Jaime Mapieza Galo, 34, minyo taga barangay Alegria, Cordova. Sa pasiunang imbestigasyon ni PO3 Joseph Cotamda ug PO3 Allan Pantaleon nasuta nga alas 10 niadtong Domingo sa gabii, miduol ang suspetsado nga si George Banticil Jr. kang Galo aron mangutana kung kinsa ang nagpasalba og armas. Kagahapon sa kadlawon gibato ang building nga gibantayan ni Galo ug sa dihang iyang nakita si Banticil, Sr. iya kining gisita nga miresulta sa pagpanumbag ni Galo ngadto ni Banticil Sr.
Si Banticil nagpalaban sa iyang anak nga si George Jr. hinungdan nga mao kini ang miresponde sa amahan ug misulong kang Galo. Atol sa ilang panagtagbo gipusil ni Banticil Jr. si Galo hinungdan nga naigo sa iyang abaga ug bukton.
Gidala sa Lapu-Lapu City Hospital si Galo apan gibalhin kini sa Vicente Sotto Memorial Medical Center samtang ang suspek daling nakabiya sa dapit human sa insidente. (BANAT NEWS)
- Latest
