Grupo ni Rosales maoy nanguna og pamusil — CHR7

CEBU, Philippines - Nakita sa Commission on Human Rights nga lehitimo ang  operasyon sa kapolisan  sa nahitabo nga shootout tali sa grupo sa kanhi pulis nga si Owen Rosales diha sa Bien Unido sa  lalawigan sa Bohol.

Matud sa chief investigator sa CHR-7, Primo Cadampog, nga ilang nahinabi ang mga kauban ni Rosales nga mitahan ug matud pa ilang giangkon nga sila gyud ang unang nagpabuto ngadto sa kapulisan.

Gidugang ni Cadampog nahinabi usab nila ang Provincial Director sa Bohol Provincial Police Office Senior Superintendent Dennis Agustin ug ilang nasayran nga adunay mga armas nga nakuha sud sa mga kwarto nga giabangan sa grupo ni Rosales.

Gitataw usab sa CHR-7 nga nakadayeg sila sa pamaagi sa Bohol Provincial Police tungod kay ilang nakita nga anaa sa maayong kondisyon ang mga dinakpan nga kauban ni Rosales ug matud pa wa silay nadungog nga reklamo nga gikulata sila ug bisan bun-og wa usab silay nakita sa mga suspek.

Nasayran nga ang mga impormasyon nga ilang nakuha iduso nila ngadto sa ilang legal counsel. Kahinumdoman nga ang ginikanan sa usa sa napatay nga 17-anyos nga si Amy Camero midangop sa CHR-7 tungod sa pagtuong naamong lang kini.

Apan base sa pamahayag sa usa ka opisyal sa Police Regional Office-7  nga positibo sa gun powder ang mga kamot ni Camero ug gidudahang apil kini sa nipabuto og pusil ngadto sa mga polis. (BANAT NEWS)