Awhag ni Rama: Gubaon nga sakyanan di padaganon

CEBU, Philippines - Giawhag ni Mayor Michael Rama ang kadagkoan sa departamento sa transportasyon nga ipahunong na ang pagpabiyahe sa mga sakyanan nga gubaon na kaayo.

Matud sa mayor nga daghan kaayo’ng sakyanan nga hilabihan na ka gubaon nga gitawag sa uban og "running coffin," apil niini ang pipila ka sakyanan nga pasaheroan, apan padayon pa nga nagdagan-dagan sa karsada.

Ang rekord sa Land Transportation Office (LTO) nagpakita nga sa Central Visayas adunay 652,828 ka lainlaing matang sa sakyanan nga narehistro hangtud sa Disyembre 31, 2013.

Gikan kaniadto’ng Enero hangtud karon nadugangan pa og kaliboan na usab ka sakyanan nga narehistro sa rehiyon-7. Base sa rekord sa LTO-7 nga ang mga sakyanan sa rehiyon madugangan og kapin sa 20,000 kada tuig.

Si Rama miingon nga supak siya nga did-an pagpadagan ang karaan nga mga sakyanan kun kini gitagad lang kanunay sa ilang mga tag-iya.

Gihandom sa mayor nga ang una niya nga sakyanan kaniadto segunda-mano nga Volkswagen nga hangtud karon wala pa gihapon niya ibaligya bisan og wala na kini niya gamita.

Ang pagdaghan sa mga sakyanan matag tuig apan wala’y bag-ong mga karsada nga gimugna ug menus ra ang karsada nga gipalapdan maoy rason nga kanunay’ng masinati ang problema sa trapiko. (BANAT NEWS)