Mga tunghaan sa Toledo dungan nga mananum og utanon
CEBU, Philippines - Subling ilusad karong hapon ang Gulayan sa Paaralan sa mga pangpublikong tunghaan sa dakbayan sa Toledo nga pasiugdahan sa Department of Education Toledo City Division. Kauban sa maong programa ang Department of Agriculture sa dakbayan ubos sa pagdumala ni City Agriculturist Lucila Tumarong. Himuon ang pagpangapod-apod sa 13 mil ka mga seedlings sa mga utanon ngadto sa tanan pangpublikong tunghaan ubos sa DepEd.
Moabot sa 63 ka mga pangpublikong tunghaan ug mga learning centers ubos sa Alternative Learning System (ALS) ang mahatagan sa maong mga seedlings.
Dungan nga itanum sa mga tunghaan sa Toledo ang mga seedlings sa Hunyo 25.
Ang Gulayan sa Paaralan usa ka tinuig nga programa sa DepEd ug DA alang sa pagtudlo ug pag-awhag sa mga estudyante sa pagtanum ug pagkaon sa mga utanon nga daghang makuha nga sustansiya alang sa kaayuhan sa panglawas.
Pagtabang usab kini sa pagmenos sa malnutrition rate sa usa ka komunidad ug lukop nasud. (BANAT NEWS)
- Latest
