Retiradong sundalo girakrakan, away sa yuta gisubay nga motibo
CEBU, Philippines - Patay ang usa ka retiradong army human kini rakraki samtang nagsakay og traysikol niadtong Martes sa gabii diha sa Barangay Lawaan I, dakbayan sa Talisay.
Ang biktima giila sa mga polis nga si Roman Hermosada, 68, residente sa maong dapit wala na makaabot nga buhi ngadto sa Talisay City District Hospital.
Sila si SPO1 Mikie Espina, SPO1 Yvonne Illustrisimo ug PO1 Stephen Sefuesca ang miresponde sa maong insidente.
Si Espina nga nahinabi sa Banat News nagkanayon nga ang biktima gikan kini diha sa Tabunok nangompra ug misakay og traysikol nga gimaneho ni Leo Sollano Delima paingon na untang mopauli dihang girakrakan sa duha ka wala mailhing lalaking sakay og usa ka motorsiklo.
Si Hermosada nakaangkon kini og upat ka samad pinusilan sa buko-buko diin ang mga bala milahos ngadto sa iyang dughan, tiyan ug paa. Ang mga lalaki daling misibat human sa hitabo.
Na-recover sa mga polis sa lugar ang pito ka kabhang sa .9mm nga bala ug usa ka slug. Duna say na-rekober nga 45 kalibre nga may pito ka buhing bala gikan kang Hermosada, si Hermosada miretiro sa Philippine Army niadto lang 2011.
Usa sa gitutokan karon sa kapolisan nga hinungdan sa hitabo mao ang bangi sa yuta tungod kay giingong gikabingkil niini ang usa sa ilang mga paryente tungod sa yutang kabilin sa ilang mga ginikanan. (BANAT NEWS)
- Latest
