Fire marshal nangita sa ubang nabiktima sa duha ka bombero

CEBU, Philippines - Human sa pagkasikop sa duha ka mga sakop sa kabomberohan sa Cebu City Fire Department, gipanawagan karon sa City Fire Marshall sa dakbayan sa Sugbo nga moduol sa iyang buhatan ug moreklamo kun kinsa kadtong mga nabiktima sa pagpangilkil sa maong mga bombero.

Si Chief Insp. Rogelio Bungabong ang hepe sa Cebu City Fire Department nga nahinabi sa Banat News miingon nga gusto niyang mosumbong ug moreklamo ang katawhan kung duna pay laing nabiktima sa duha.

Matud pa sa opisyal nga nasurpresa gayud siya sa nahitabo sa iyang mga sakop nga sila si SFO4 Joseph Ababon ug Leonidas Benatero nga na-entrap sa NBI sud mismo sa City Treasurer’s Office human matud pa nangilkil sa usa ka negosyante.

Gipasabot sab ni Bungabong nga unta magsilbi kini nga leksyon sa uban pa nga sakop.

Naghimo na ‘sab sila karon og linahi nga imbestigasyon aron pagsubay sa maong panghitabo ug nakapasa na ‘sab sila og incident report ngadto na sa ilang mga labaw.

Apan gipasalig ni Bungabong nga ipasubay gihapon niya sa due process ang pag-imbestigar sa iyang mga sakop, bisan pa man sa maong pasangil ug gipaabot sab niini ang imbestigasyon sa NBI labot sa maong hitabo.

Kasong administratiba ang atubangon sa duha ka mga sakop niini, diin gipasalig ‘sab sa opisyal nga dili siya magpanuko sa pagpatangtang sa iyang mga tawo nga magbinuang sa ilang trabaho.

“Ato g’yud ning tinud-on kay dili man maayo ang gibuhat nila, unta mahimo ning eye opener sa tanan,” matud pa ni Chief Insp. Bungabong.

Usa ka negosyante nga naila nga si Marilyn Mar ang nagpatabang sa NBI human giingong gipangayoan og P10 mil sa usa sa mga suspek aron palabyon na lang ang violation sa pultahan nga angayan untang pailisan sa sud sa gipanag-iya niining pribadong eskuylahan. (BANAT NEWS)