FDA miawhag sa publiko pagbantay sa ilang paliton
CEBU, Philippines - Nunot na sa pagronda sa National Bureau of Investigation sa duha ka tindahan nga namaligya’g banned nga slimming pills, ang Food and Drugs Administration (FDA) adunay pahimangno sa publiko.
Ang FDA mipahimangno sa katawhan nga dili magpataka og palit og produkto nga dili rehistrado sa ilang buhatan tungod kay makadaot kini sa panglawas.
Matud sa pangulo sa FDA nga si Sophia Mancao nga ang trabaho sa ilang buhatan mao ang pagsiguro nga ang publiko luwas sa mga produkto nga ilang gamiton o paliton.
Gatosan ka nagkalain-laing mga slimming pills ang gisakmit gikan sa Beauty Shape Cosmetics ug Yu Lian Merchandising pulos sa downtown area ning dakbayan tungod sa kalapasan sa Republic Act 3720.
Dugang pa ni Mancao nga kun ang tawo makagamit ug makainom og mga produkto nga peke ang posibleng makamatay kini ug ang uban dunay mga side effects.
Giawhag niya ang mga mamalitay nga kinahanglang tan-awon gyud ang mga produkto kung duna bay tatak sa FDA ang label niini ug ang content sa gibaligya. (/EIM)(BANAT NEWS)
- Latest
