Eskapo sa Medellin nisurender sa Bacolod
CEBU, Philippines - Wala na’y kwarta nga ikagasto sa iyang kaugalingon ang nakaaghat sa 17-anyos nga eskapo sa Medellin Police Station sa pagtahan sa Bacolod City Police Station niadtong Biyernes.
Ang batan-on mi-eskapo niadtong Abril sa dihang gihikay na unta ang mga dokumento human ang reklamante sa kasong robbery misibog na sa kaso.
Matud ni Sr. Insp. Argel Ancheta, hepe sa Bacolod City Police Station, nga ang pugante mitug-an nga eskapo siya sa Sugbo hinungdan nga daling gitawagan si Supt. Rodulfo Albotra Jr, hepe sa Provincial Intelligence Branch, aron sa pagkumpirma sa taho.
Ang dinakpan giingong miuli sa ila human mieskapo ug gihatagan og kwarta sa iyang ginikanan nga iyang gigamit pagkuha og ticket sa eroplano paingon sa Iloilo. Gikan sa Iloilo misakay kini paingon sa Bacolod.
Human nasayri ni Chief Insp. Fructuoso Lim, hepe sa Medellin Police Station, ang pagsurender sa batan-on, dali kining mimando sa iyang sakop sa pagkuha sa akusado.
Matud ni Lim nga ang pagpakita sa suspek makahatag na og katin-awan sa mga alegasyon nga giluwatan sa ginikanan niini batok kaniya ilabi na sa pasangil nga gihimo nila kini nga sulogoon sa estasyon.
“Puro to pamakak ilaha karon maklaro na gyud ang kamatuoran…kahibaw na man gyud na sila kung asa ilang anak under their supervision,†matud ni Lim.
Apan ang amahan sa akusado mihimakak sa mga pasangil. Matud niya nga natingala usab sila nganong naabot sa Bacolod City ang ilang anak. Ang dinakpan gikatakdang moabot sa Sugbo karong adlawa. (BANAT NEWS)
- Latest
