Mga kasong murder sa Mandaue ningdaghan

CEBU, Philippines - Nisaka ang mga kasong murder sa dakbayan sa Mandaue gikan sa buwan sa Enero ning tuiga itandi sa niaging tuig human nakatala ang Mandaue City Police Office (MCPO) og siyam ka kaso. Sa samang mga buwan sa tuig 2013, upat lang ka kaso ang natala sa MCPO.

Hinoon upat lang ang kasong homicide sa 2014 samtang napulo sa niaging tuig. Walay natala nga kasong parricide karong tuiga ug sa niaging tuig.

Niubos usab ang kasong pagpamun-og gikan sa 673 sa niaging tuig ngadto sa 652 sa unang kwarter ning tuiga. Samtang gipasakaan na og kasong murder ug multiple physical injuries ang drayber sa motorsiklo nga gisakyan sa suspek nga nagpusil patay sa usa ka negosyanteng babaye sa dakbayan sa Mandaue.

Si David Bolabola Llanto alyas David nga taga Hipodromo, dakbayan sa Sugbo ug kasamtangang nagpuyo sa Mantuyong, dakbayan sa Mandaue ang gipasakaan na og kaso.

Lakip sa gipasakaan og kaso ang suspek sa pagpusil patay kang Imelda Tio Yu, tag-iya sa usa ka furniture firm sa Subangdaku, nga naila lang sa angga nga Ongod.

Samtang gipangita ang suspek, gisuta usab sa kapolisan ang nagpaluyo sa krimen tungod kay dako ang ilang pagtuo nga adunay nagpaluyo sa kamatayon sa biktima. (BANAT NEWS)