Dakong drug syndicate ang nakabangga – CAIDSOTF
CEBU, Philippines - Hepe sa City Anti- Illegal Drugs Special Operation Task Group (CAIDSOTF) sa Lapu-Lapu City Police Office nagtuo nga dakong drug syndicate ilang nakabangga.
Ang grupo ni Senior Inspector Rogelio Pineda nakaengkwentro ug napatay ang duha ka mga miyembro sa maong drug syndicate diha sa Barangay Looc sa maong dakbayan sa miaging semana.
“Mitoo pa ‘ko sa atong gobiyerno ug sa atong hustisya. Trabaho lang ‘ta, og mopasaka sila og kaso ilaha pud na nga katungod, atong atubangon,†kini maoy pamahayag ni Pineda kinsa nagtuong gusto gyud siyang mapapha sa pwesto sa maong grupo nga nagbase dinhi sa Sugbo.
Si Pineda mingon nga lehitimong operasyon ang ilang gilusad human sa taas kaayong panahon nilang pagpaniid sa grupo sa napatay nga si Romeo Daleon kinsa giingong notadong drug pusher sa Barangay Looc, Lapu-Lapu City. Napatay usab sa maong engkwentro si Magno Yongco Jr. samtang naangol si Romulo Cabase. Si Cabase kinsa nagpa-interbyu sa The Freeman kusganong mihimakak sa mga alegasyon sa kapolisan nga duna sila’y mga armas ug illegal drugs.
Matud pa ni Cabase kalit lang silang gipaulanan og bala ni PO3 Joseph Villamor ug mga kaubanan. Si Villamor nasamdan sa tiyan atol sa maong hitabo.
Sumala pa sa kapolisan gipalitan nila og drugas ang mga suspek apan nakaila ang mga suspek kang Villamor ug giunhan kini pagpusil.
Si Cabase kinsa nangangkong tiglimpyo sa sakyanan ni Daleon nakapiyansa og P200 mil sa kaso sa illegal drugs ug nakauli na sa ilaha sa Duljo-Fatima. Matud pang Pineda napriso na si Cabase niadtong 2006 sa kaso gihapon sa drugas ug nakagawas niadtong 2007.
Giangkon ni Pineda nga apektado ang iyang tropa sa mga nanggawas karon nga mga balita apan expected na nilang daan nga pasakaan g’yud sila og kaso sa ilang nakaengkwentro. (BANAT NEWS)
- Latest
