P2M nga poultry farm gilamoy sa sunog sa Pinamungajan

CEBU, Philippines - Gibana-bana nga mokabat og P2 milyones ang danyos sa sunog nga miigo sa usa ka poultry farm nga gipanag-iya sa konsehal sa dakbayan sa Carcar nga nahimutang sa Barangay Tupas sa lungsod sa Pinamungajan pasado alas 6:00 sa hapon sa miaging buntag.

Base sa spot report sa kapolisan nga nakadawat ang Pinamungajan police og tawag gikan ni Kapitan Antonio Tante sa Barangay Tupas kabahin sa usa ka sunog nga miulbo sa iyang barangay.

Ang nasunog mao ang poultry farm nga gipanag-iya ni konsehal Archiles Gantuangco, 46, molupyo sa Valladolid sa dakbayan sa Carcar.

Base sa imbestigasyon sa kapolisan nga pasado alas 5:00 sa buntag ang caretaker sa maong poultry farm nga si Jhonfiel Cantilla nakakita nga may mi-spark sa kilid sa building.

Nagtuo si Cantilla nga gikan ang maong spark sa wire sa maong building ug pipila ka gutlo ang milabay kalit lang mikuyanap ang kalayo lukop na sa maong poultry farm.

Ang maong building ginama lamang sa light ug plastic materials base sa pamahayag sa tag-iya sa maong building ngadto sa kapolisan.

Matud pa nga naggamit sila og modern equipment sa pagpamuhi og manok hinungdan nga dako kaayo ang danyos sa maong sunog. Ang kapolisan ug kabom-berohan nagpadayon pa sa imbestigasyon sa maong hitabo.  (BANAT NEWS)