Babayeng negosyante gibanhigan

CEBU, Philippines - Patay ang usa ka negosyante nga babaye ug naangol usab ang duha ka tawo sa nahitabong pagpamusil diha sa eskina M.C. Briones ug A.C. Cortes Avenue sa ilawom sa Maguikay flyover, Barangay Guizo, dakbayan sa Mandaue sa miaging Biyernes sa gabii.

Ang namatay nga magpapatigayon mao si Imelda Tio Yu, 44, taga Holy Family Town Homes, Barangay Maguikay, Dakbayan sa Mandaue ug giingong anak sa iladong tag-iya sa dakong tindahan sa furniture sa Metro Cebu.

Samtang ang mga naangol mao sila si Roger Lobrido Calumba, 50, taga Sitio Pilit, Barangay Cabancalan nga maoy drayber sa traysikol ug Arnel Sedillo Juanite, 31, laing pasahero sa traysikol nga kasakay ni Yu.

Ang magpapatigayong babaye nakabaton og samad pinusilan sa iyang dughan  ug milapos sa kilid sa lawas ug miungot ang bala sa bukobuko ni Calumba. 

Si SPO3 Marcos Noval sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga naandan na sa biktima ang pag-commute pauli sa ilang panimalay gikan sa gidumala niining tindahan.

Matud pa ni SPO3 Noval nga nagtuo sila nga nag-atang na daan sa maong dapit ang wala hiilhing mamumuno ug sa paglingkod sa biktima sa luyong lingkuranan sa drayber , giduol niini dayon si Yu dayon pusil niini sa makadaghang higayon.

Ang wala hiilhing mamumuno daling miangkas sa nagpaabot nga kaubang nagmotorsiklo ug mipabulhot kini sa pagpadagan pahilayo sa maong dapit.

Gidala ang mga biktima sa Mandaue City Hospital apan gideklarar si Yu nga patay na samtang gibalhin sa Vicente Sotto Memorial Medical Center sa dakbayan sa Sugbo sila si Calumba ug Juanite.

Padayon pa karon ang kapolisan pagtino sa motibo sa maong krimen sanglit wa pay kabanay ni Yu nga mihatag kanila og pamahayag.  (BANAT NEWS)