Palma naglaum kamatuoran sa PDAF scam mogawas

CEBU, Philippines - Malaumon si Arsobispo Jose Palma nga mogawas ang kamatuoran sa kontrobersiya sa Priority Development Assistance Fund (PDAF) nga naglambigit sa pipila ka mga senador ug mga kongresista.

 Matud ni Palma nga tungod sa kadaghan sa lista nga gipagawas, dili kalikayan nga magduda kun kini gihimo aron kahatagan og hustisya ang hitabo o gihimo lang kini aron pagduot niadtong mga tawo nga gusto nilang mabilanggo.

Gihulagway sa Arsobispo nga kun tinuod man nga ang anaa sa listahan nalambigit gyud sa pork barrel scam angay kining tukion ug hukman aron mahibaw-an ang mga sad-an.

Gitataw usab niini nga angay dawaton sa mga tawo nga sad-an ang silot nga ipahamtang kanila tungod kay nakahimo man sila og kasaypanan.

Nasayran nga dili lang si PDAF Scam Queen Janet Lim Napoles ang mihatag og lista apan lakip na sila si Benhur Luy ug kanhi senador Panfilo Lacson.

Kahinumduman nga ang Coalition Against Pork Barrel System mihulagway nga usa lang ka pangbulabog sa kaso ang pagpagawas sa lista sa ngan sa mga magbabalaud ug senador nga apil sa nakabenepisyo sa pork barrel scam. Hinuon ilahang tun-an ang lakang nga ilang himoon aron mahibaw-an gyud kun si kinsa kadtong mga nalambigit sa isyu.

Samtang ang mga senador ug kongresista nga anaa sa listahan pulos usab mihimakak nga aduna silay transaksyon nga gihimo sa mga bogus nga grupo ni Napoles. (BANAT NEWS)