Salesman sa sigarilyo gitulis
CEBU, Philippines - Gitulis ang usa ka salesman sa usa ka tobacco company samtang nanghatud sa order sa mga tindahan ug nangolekta sa may sitio Wang Yu, Alaska, Mambaling, dakbayan sa Sugbo niadtong Sabado sa buntag.
Igo na lang sa pagpa-blotter sa Mambaling Police Station ang usa ka William Uy Yu, 31, nagpuyo sa Saint Michael Village, Banilad, dakbayan sa Sugbo, human sa hitabo.
Asoy sa biktima kalit lang duha ka tulisan ang miduol kaniya ug mition sa usa ka pistola ug mideklarar og hold-up.
Nakuha sa duha ka mga tulisan ang iyang nakolekta nga P10 mil sulod sa usa ka belt bag ug cellphone balor og P10 mil.
Human sa pagpanulis, dali nga mipalayo ang duha sulod sa sudlonong bahin sa nahisgutang lugar.
Dali unta nga miresponde ang alert team sa Police Station 11 apan pakyas sila sa pagsikop sa duha ka tulisan.
Matud ni PO3 Sean Colobio sa Mambaling Police Station nga nahinabi sa Banat News nga posibling local boys lang sa maong lugar ang mihimo sa pagpanulis.
Ila pang gipaabot ang biktima nga mobalik ug makig-alayon sa ilang buhatan aron ilang suwayan sa pagpakita sa mga hulagway sa gallery sa mga notadong tulisan sa pamasin nga iyang mailhan. (BANAT NEWS)
- Latest
