Pulis naka-drive sa firetruck
CEBU, Philippines - Napugos pagmaneho sa firetruck ang usa ka pulis sa lungsod sa Tabogon human miulbo ang sunog sa ilang merkado samtang walay driver.
Pasado alas 11 sa gabii niadtong Martes, nagkagubot ang mga residente sa Barangay Piyo, Tabogon human miulbo ang usa ka sunog sa ilang karaan nga merkado.
Matud ni Police Insp. Bonifacio Pareja, hepe sa Tabogon Police Station, nga human nadawat nila ang alarma, dali dayun sila nga nitawag og tabang sa kabomberohan.
Adunay usa ka fire truck ang lungsod nga nakaparada atbang sa ilang buhatan.
Apan sumala ni Pareja nga walay driver ang maong firetruck atol sa maong sunog.
“Wala man gyud na sila’y opisina diri sa Tabogon, nagparking ang ilang firetruck diri sa atbang, pagsunog na, nangita nami sa driver, wala gyud namo nakita, ambot basin naa’y gilakaw,†matud ni Pareja.
Wala’y nabuhat ang opisyal kun dili ang pagmando sa iyang mga tawo nga maoy molihok isip mga bombero ug tayming nga nahabilin ra ang yawe sulod sa firetruck.
Sa gihimo nga assessment sa kapolisan, kapin sa usa ka milyon ka pesos ang danyos sa sunog.
Dugang ni Pareja nga kini ang labing unang higayun nga usa ka pulis ang nakaahat og maneho sa firetruck aron pagresponde sa usa ka sunog sa ilang lugar. (BANAT NEWS)
- Latest
