Usa nagpositibo atol sa random drug test
CEBU, Philippines - Usa sa 37 ka mga empleyado sa Provincial Environment and Natural Resources Office ilabi na kadtong mga sand and gravel inspectors ang nagpositibo atol sa random drug test nga gipahigayon kagahapon sa alas-9 sa buntag. Ang Philippine Drug Enforcement Agency (PDAF) ug Cebu Provincial Anti-drug Abuse Council (CPADAC) mao ang mipahigayon sa maong random drug test nga himuon kada adlaw nga Lunes sumala pa sa Executive Director sa CPADAC nga si Joey Herrera.
Kwarenta unta ka mga empleyado ang ipailawom sa drug test apan 37 ra kanila ang mitungha, ang duha absent, ang usa mitunga apan nahuman na ang drug test apan gimandoan gihapon siyang magpa-drug test sa usa ka accredited drug testing center. Ang duha ka mga empleyado nga wa motunga ipatawag sa Human Resources department alang sa posibleng pagtaktak kanila.
Kadtong nagpositibo nga lalaking outsource employee awtomatikong suspensuhon ug ipailawom sa confirmatory test ang iyang specimen.
Sa miaging buwan, siyam ka kawani ang nagpositibo sa drug test, duha nila mga babaye ug pito ang lalaki. (BANAT NEWS)
- Latest
