Lalaki giluba patay, anggulo sa drugas gidudahan

CEBU, Philippines - Buntag na nga nakita sa ilang silingan nga naligo sa iyang kaugalingon nga dugo ug wala na’y kinabuhi ang usa ka lalaki nga gidunggab sa wala pa maila nga mamumuno.

Usa ka barangay tanod sa sitio Lahing-Lahing sa Barangay Mabolo ning dakbayan sa Sugbo ang mibutyag sa kapolisan nga usa ka Henry Flores, 38, taga M. Borces Street, Mabolo  ang napalgang patay sa maong dapit,

Nasuta nga unom ka samad dinunggaban  ang naangkon sa biktima atol sa pagsusi ni SPO4 Alex Dacua sa Homicide Section sa Cebu City Police Office.

Matud pang Dacua alas-2 sa kaadlawon nakadungog ang mga tawo og komosyon apan wala lang nila panumbalinga apan pagkabuntag gikagubtan na ang patay’ng lawas ni Flores. Nakuha sa kapulisan sa lawas sa biktima ang usa ka disposable lighter ug usa ka totter.  Anggulo sa ilegal nga drugas ang usa sa mga gisubay nga motibo sa kapulisan, ang inahan niini miangkon usab nga tiggamitan og drugas ang iyang anak.

Gibutyag usab niini nga amigo sa iyang anak ang gipatay nga pag-umangkon ni Bise Mayor Edgardo Labella sa Barangay Day-as nga si Rolan Colina. Dunay nakita nga tunob sa tiil nga adunay lama sa dugo, ug usa ka stinelas nga gituhoan nga iya sa nagpatay ang nakita sa kapulisan, apan pakyas sila nga matumbok kini. (BANAT NEWS)