Managkapuyo gitawgan sa cellphone gipamusil

CEBU, Philippines - Managkapuyo nangaangol human nasulod sa laang sa ilaha untang mga mamumuno nga mitawag sa cellphone sa usa sa mga biktima diha sa Barangay Cogon, dakbayan sa Carcar kagahapon sa kaadlawon.

Giila ang nangalandig sa tambalanan nga mao sila si  Glenn Allan Mayhew, 21, ug Engelie Bargayo, mga residente sa Poblacion 3, sa maong siyudad.

Matud pa sa imbestigasyon sa Carcar PNP nga gipangulohan ni PO3 Jerson Antiampo ug PO2 Madison Singco nga samtang nagtan-aw og variety show ang duha sa ilang lugar dunay mitawag sa cellphone ni Mayhew kay gusto kining makigkita nilang duha sa Barangay Cogon.

Sa wala pa masayring hinungdan, misanong usab ang duha pag-adto sa maong dapit apan pag-abot didto gikatahong dunay mga tawong mipusil kanila.

Ang duha pulos nakaangkon og samad pinusilan sa nagkadaiyang parte sa ilang lawas. Dali silang gitabang sa mga residente sa maong lugar ug gihatod sa Cebu Provincial Hospital sa Carcar.

Sa pagkakaron blangko pa ang kapulisan sa pag-ila sa mga mamumuno ug pagtumbok sa motibo sa maong krimen. (/EIM)(BANAT NEWS)