Honoraryom sa mga opisyal sa barangay gihatag na

CEBU, Philippines - Dagko kaayo’g ngisi ang mga opisyal sa lainlaing barangay dinhi sa dakbayan sa Sugbo kagahapon kay gipanghatag na kanila ang bali’g tulo ka buwan nila nga “additional honorarium” gikan sa City Hall.

Ang mga kapitan sa barangay nakadawat og ‘tag P15 mil, konsehal P9,000 ug ang mga barangay treasurer ug secretary ‘tag P6,000. Alang kadto sa buwan sa Enero, Pebrero ug Marso.

Bisan og ang mga opisyal sa kabarangayan adunay gidawat nga honorarium gikan sa masi’g nila ka barangay apan gipahatagan pa sila ni Mayor Michael Rama og dugang honorarium ug dili g’yud malangan ang paghatag kanila.

Si Mayor Rama mipasabot nga ang mga opisyal sa kabarangayan nagkinahanglan kaayo sa mao nga salapi kay daghan sa ilang mga molupyo mangayo kanila og tabang.

Ang mga kapitan sa barangay ug pipila ka konsehal sa barangay nga suod kaayo ni Rama gipanghatagan usab sa mayor og bag-o g’yud nga mga sakyanan.

Kini maoy hinungdan nga ang ubang konsehal sa dakbayan nasilo ngadto sa mayor kay ang uban kanila nag-antos sa daan nga mga sakyanan. (BANAT NEWS)