Pagpanghatag og pump boat ipadayon g’yud sa BFAR

CEBU, Philippines - Hayan dili mahuman sa Bureau of Fisheries and Aquatic Resources (BFAR)-7 ang pagpang-hatag og 2,000 ka bangka’ng de motor alang sa mga mangingisda nga apektado sa bagyong Yolanda. Matud ni BFAR-7 Regional Director Andres Bojos nga sa kinatibuk-an nila nga target, mga 200 pa lang ka bangka nga adunay makina ang ilang nahatag sa mga mananagat nga nawad-an sa ilang panginabuhian.

Gipasalig hinuon ni Bojos nga bisan og malangan ang pagpanghatag nila sa mao nga tabang sa mga mangingisda nga biktima sa katalagman apan ipadayon gayud nila ang gimbuhaton.

Matud ni Bojos nga kun dili nila mahuman sa Hunyo, magpadayon gihapon ang maong programa sa mosunod pa nga mga buwan. Dili lang ordinaryo’ng mga bangka ang ihatag sa BFAR kay ang uban niini hinimo sa lig-on nga materyales sama sa kahoy ug fiber glass. (BANAT NEWS)