May kuwarta na alang sa merkado sa Tabunok

CEBU, Philippines - Ang kagamhanan sa dakbayan sa Talisay makakita na og budget gikan sa national nga kagamhanan alang sa katukoran sa bag-ong building sa merkado publiko sa Tabunok.

Si Talisay City Administrator John Yre De los Reyes mibutyag nga ang Department of Public Works and Highways (DPWH) 2nd engineering district mogahin og P50 milyones nga budget alang sa nahisgutang proyekto.

Samtang ang rehiyonal nga buhatan sa DPWH mogahin kini og P150 milyones alang sa proyekto.

Gibutyag ni De los Reyes nga ang maong mga budget iagi kini ngadto sa National Disaster Risk Reduction and Management Council (NDRRMC) ug ang maong ahensiya mao na ang mo-apod-apod sa nahisgutang duha ka buhatan sa gobiyerno nga maoy moimplementar sa proyekto.

Gipasabot ni De los Reyes nga ang daang building sa merkado sa Tabunok naagian na kini og mga katalagman sama sa sunog, linog ug bagyo ug nasuta nga ang nahisgutang building dili na kini luwas nga pundohan og tawo hinungdan nga ipaubos na kini sa “total rehabilitation”.

Ang budget ipaagi sa NDRRMC tungod kay naguba man sa katalagman ang maong building.

Sa milabay’ng mga buwan ang mga opisyal sa executive ug legislative departments sa Talisay nagkabangi tungod kay wala aprobahi sa konseho sa siyudad ang pag-apply og loan nga P387 milyones ngadto sa banko ni Mayor Johnny De los Reyes aron gastohon sa pagtukod og merkado.

Ang pipila ka konsehal miingon nga dili angay’ng magdali-dali ang mayor tungod kay ang maong proyekto nagkinahanglan pa kini og feasibility study.

Ang city administrator nagkanayon nga ang mayor na lang maoy nangita og paagi nga makakuha og pundo alang sa proyekto.

Gikatakda unta nga sa buwan sa Marso o Abril niining tuiga sugdan na ang pagpatukod sa bag-ong building sa merkado kun nahinayon pa ang pag-loan og kuwarta sa Talisay gikan sa banko.  (BANAT NEWS)