Duha ka saksi pabor sa polis ug konsehal

CEBU, Philippines -  Duha ka saksi nga pabor nila ni SPO4 Edgar Sagarino ug Lapu-Lapu City Councilor Leo Mercado mitungha kagahapon sa buntag diha sa buhatan sa Crime Against Persons Desk (CAPD).

Si Sagarino ang mipusil sa 67-anyos nga si Patrocinio Baring dihang kini nagmaoy sulod sa buwangan sa dakbayan sa Lapu-Lapu ug misuway og pusil kang Konsehal Mercado niadtong milabay’ng Sabado.

Si Chief Inspector Eloveo Marquez sa Lapu-Lapu City Police Office mibutyag nga ang maong duha ka saksi mopaubos kini sa imbestigasyon ug gikatakdang moluwat og affidavit.

Si Marquez midepensa ni Sagarino nga legal ang pagresponde sa maong polis.

Sa milabay’ng adlaw ang kabanayan ni Baring nga si Nena Baring ug mga anak niini midangop ngadto sa Commission on Human Rights (CHR) kabahin sa nahitabo sa biktima diin giingong nalangay kini pagdala ngadto sa tambalanan hinungdan nga nahutdan sa dugo ug namatay.

Si Baring gitabangan usab kini og kulata sa ubang tawo diha sa buwangan bisan og duna na kini samad pinusilan.

Ang officer-in-charge sa Lapu-Lapu City Police Office, Senior Superintendent Armando Radoc nagkanayon nga legitimate operation ang gipahigayon ni Sagarino.

Nasuta sa Banat News nga si Sagarino gikatakdang moretiro na kini sunod tuig sa katungdanan isip polis.  (BANAT NEWS)