Balay gikawatan, P500 mil kwarta ug alahas nakuha
CEBU, Philippines - Wala pa’y ideya ang kapolisan sa Mandaue kun kinsa ang mga kawatan nga misaka sa balay sa usa ka adunahan nga magpapatigayon sa Barangay Cabancalan ug mikuha sa dul-an sa tunga sa milyon ka pesos nga kantidad sa alahas ug salapi.
Ang balay nga gisaka’g kawatan didto sa North Townhome’s Subdivision sa Barangay Cabancalan kaniadto’ng Huwebes sa kaadlawon gipanag-iya ni Cherryl Mendoza, 25.
Si SPO1 Renato Canja, sakop sa Presinto 4 sa Mandaue City Police Office (MCPO), mitug-an nga hangtod karon nagpadayon pa sila sa paghimo og imbestigasyon sa mao nga pagpangawat.
Gitug-anan ni Mendoza si PO3 Martin Lofranco, imbestigador sa Investigation Detection and Management Bureau (IDMB) nga nahigmata siya tungod sa kasikas sulod sa master’s bedroom sa ilang panimalay.
Pagsusi ni Mendoza nakita pa niya ang bayhon sa lalaki nga nangukay sa ilang mga butang nga naglakip na sa drawer nga gisudlan sa alahas ug salapi. Ang lalaki nga nakabantay mikalit pagdagan.
Lakip sa nakawat mao ang usa ka wedding ring nga adunay diamond - P250,000; duha ka paresan nga ariyos - P80,000; usa ka ariyos nga adunay diamond -P80,000; duha ka kuwentas nga bulawan -P40,000; usa ka i-Phone ug P25,000 nga cash. (/RUB)(BANAT NEWS)
- Latest
