Cult leader gikasohan sa nbi-7

CEBU, Philippines - Gipasakaan na kagahapon sa National Bureau of Investigation-7 og kasong serious illegal detention ug illegal possession of firearms ang gitumbok nga lider sa usa ka kulto nga ilang nadakpan sa Toledo City sa miaging adlaw.

Ang gikasohan mao si Casciano Apduhan diha sa Toledo City Prosecutor’s Office. Si Apduhan nasikop atol sa operasyon sa Provincial Women’s Council, NBI-7  ug Cebu Provincial Police Office gumikan sa alegasyon nga gitanggong niini ang usa ka babaye gikan pa niadtong 2008. Matod ni Rey Villordon team leader sa pagsikop kang Apduhan nga ilang awhagon ang ubang mga nabiktima sa suspek sa barangay Buanoy nga mopatim-aw sa ilang buhatan ug mosang-at og reklamo.

Gikatakda usab nga pasakaan usab og kasong murder ug human trafficking ang suspek tungod sa giingong wala niini pagsweldo sa iyang mga tawo ug sa nadiskubrehang kalabira sa usa ka 14 anyos nga bata nga naugkat sa ilawom sa tunnel sa panimalay ni Apduhan. Ang suspek mihimakak sa mga alegasyon kay matud niya mihangyo ang amahan sa bata nga adto ilubong sa iyang panimalay ang patay’ng lawas sa iyang anak aron kanunay niya kining makita. “Pagkamatay nihangyo na ang amahan sa bata ilubong na diha sa silong, ilubong sa iyang duol aron makita ra niya, mao na ang tinuod,” asoy ni Apduhan.

Giklaro usab ni Apduhan nga wala niya gitago ang 33-anyos nga babaye kay nagpakitabang kini kaniya human giingong gimaltrato sa iyang pamilya.

Gihimakak usab niini nga iyaha ang mga armas nga nasakmit lakip na ang mga malaw-ay nga mga butang nga nasakmit sa iyang posesyon ug iyang gihulagway nga planted lang kini sa mga tawo nga nasuko kaniya.  (BANAT NEWS)