Tommy nakasaway ni Rama pag-usab-usab og huna-huna

CEBU, Philippines - Gisaway ni kanhi Kongresista Tomas R. Osmeña si Mayor Michael Rama tungod sa pagpaguba niya sa sementado nga “road separator” nga gitukod taliwala sa dalan Katipunan sa Barangay Labangon nga iyang giaprobahan kaniadto.

Matud ni Osmeña nga tabla ra nga giusik-usikan ni Rama ang kwarta sa barangay nga gigamit sa pagpatukod sa mao nga “road separators” aron unta malikayan ang aksidente sa mga sakyanan.

Apil nga misaway sa mayor mao ang kapitan sa Barangay Labangon nga si Victor Buendia nga matud pa nagplano nga mopasaka og kaso batok ni Rama. Si Rama sa iyang bahin miingon nga dili siya mahadlok kun adunay mopasaka kaniya og kiha sa iyang gihimo nga pagpaguba sa mao nga “road separator.”

Apan lahi ang panglantaw ni Rama kay matud niya ang pagbutang sa mao nga sementado nga road separator taliwala sa karsada makahatag hinoon og risgo sa mga motorista.

Giangkon ni Rama nga nakapirma siya sa dukomento nga nagtugot pagtukod sa mao nga road separators apan nahimo kadto ka’y aduna ma’y rekomendasyon sa iyang mga opisyal.

Atol sa press conference kagahapon, gipasabot ni Rama nga sa ngadto-ngadto iyang natimbang-timbang nga dili maayo ang pagbutang sa sementado nga road separator sa mao nga dapit.

Ang mga opisyal sa Labangon nakabantay nga adunay mga motorista nga mo-overtake gihapon sa ubang sakyanan bisan anaa na sila sa eskena mao nga nahukman nila nga butangan og road separator ang taliwala sa karsada.

Apan si Osmeña miingon nga ingon gayud niini ang batasan ni Rama sama sa pagpirma niya sa ordinansa unya paglabay sa pipila ka adlaw ira ra usab nga gi-veto.  (BANAT NEWS)