Street Party sa Lapu-Lapu

CEBU, Philippines - Kalihukan sa RAMPADA 2014 gipangandaman na sa mga opisyal sa dakbayan sa Lapu-Lapu. Matud pa ni Lapu-Lapu City Konsehal Harry Radaza, tsirman sa Committee on Tourism ug organizer sa RAMPADA, nga mas bongga ang kalihukan karong tuiga kun itandi sa milabay’ng tulo ka tuig nga pagpasundayag niini.

Gawas sa gahin nga ilang gipadak-an karong tuiga alang sa mga premyo sa moapil, daghan usab nga kausaban ang ilang gihimo aron malingaw ang mga bisita atol sa street party.

Usa sa kausaban mao ang paglain sa kalihukan o indigay sa Float, higante ug uban pang mosalmot sa parada, ila kining gitawag nga Kahayag Parade nga himoon sa adlaw’ng Sabado Abril 26 diin tanang moapil adunay mga dayandayan nga mosidlak sa kahayag inig ka gabii.

Ibuwag usab ang kompetisyon sa RAMPADA nga pulos lang street dancing ang masaksihan sa tibuok adlaw nga Domingo, Abril 27 nga maoy pagsaulog sa adlaw nga nabuntog ni Lapu-Lapu si Ferdinand Magellan.

Hinuon duha lang ka kategoriya ang maong street dancing nga kini bukas tanan nga gustong moapil sulod ug gawas sa Lapu-Lapu ug ang Barangay category nga iya lang sa kabarangayan sa Lapu-Lapu ug sa isla sa Olango.

Ang mga naandang kalingawan sama mga disco mobile sa matag FM stations, concert, cosplay ug ang inom sa mga bisita magpabilin sud sa duha ka adlaw nga hudyaka sa kadalanan.

Ang mga karsada gikan sa 1st Mandaue-Mactan bridge hangtod na sa Marcelo Fernan Bridge pagatak-opan sugod alas  6:00 sa buntag hangtod na sa alas 4:00 sa kadlawon karong Abril 26 ug 27 atol sa maong kalihukan.  (BANAT NEWS)