Demolisyon sa Apas magpadayon, 20 ka pamilya midawat og bayad

CEBU, Philippines - Magpadayon ang demolisyon sa mga balay sa Barangay Apas, Cebu City kini human si Regional Trial Court Judge Estela Alma Singco wa mopagawas og desisyon sa gipangayong temporary restraining order (TRO) ug injunction sa mga residente. Matud ni Atty. Mark Anthony Gaviola, legal counsel ni Aletha Suico-Magat, tag-iya sa luna 942 ug 947 nga tungod wala moluwat ang korte og TRO magpadayon ang pag-enforce sa order ni Municipal Trial Court in Cities (MTCC) Judge Pamela Baring-Uy.

Apan tungod kay nagkasabot man ang duha ka habig sa hearing kagahapon, ang 20 ka kliyente ni Atty. Feliciano Lope Payot dili apilon og demolish hangtud sa Abril 15.

Sumala pa nga ang mga kliyente ni Payot mipadayag sa korte nga boluntaryo silang moguba sa ilang panimalay. Tungod niana for humanitarian consideration, si Magat pinaagi ni Gaviola mihatag og P50,000 sa 20 ka kliyente ni Payot isip financial assistance.

Kagahapon ang 15 nga kliyente ni Payot nga nitungha sa korte nakadawat og P25,000 human mopirma nga mobulontaryo silang moguba ug mobiya sa lugar. Ang katunga ihatag sa korte human maguba sa  hingpit ang ilang mga balay. Matud ni Singco nga bisan nidawat sila sa kwarta wa kini magpasabot nga dili na sila maka-avail sa relocation site ug  uban pang legal remedies. Matud niya pwede pa gihapon silang moapelar sa kaso. Samtang si Gaviola mipadayag nga bukas sila nga mohatag og P20,000 ngadto sa P45,000 nga financial assistance sa pamilya nga mo- vacate sa ilang balay bisan dili kliyente ni Payot.

Si Atty. Collin Rosell, pangulo sa City Division for the Welfare of Urban Poor (DWUP) mibutyag sa media nga ang 157 ka  apektadong pamilya pwede maka-avail sa relocation apan malangay kini og diyutay tungod sa proseso. (BANAT NEWS)