Managkapuyo sa Danao girakrakan usa ang patay

CEBU, Philippines - Patay ang usa ka lalaki ug kritikal usab ang kapuyo niini dihang gipamusil sa manag-amahang silingan sa Barangay  Maslog, Dakbayan sa Danao niadtong Domingo sa hapon.

Ang namatay mao si Ryan Rota, 25, samtang grabeng naangol ang kapuyo niini nga si Madel Montecillo, 27. Nadakpan hinuon ang namusil nga sila si Sergio Capin, 52, ug anak  niini nga si Serwin Capin, 26, nga pulos silingan sa mga biktima.

Si SPO4  Arestio  Espina sa kapolisan sa maong dakbayan miingon nga diha sa sulod sa ilang  panimalay  ang mga biktima  uban sa mga sakop sa pamilya samtang nagkanta sa videokehan.

Nakurat na lang sila nga kalit nga miabot ang mga suspek ug diretsong mipaulan og bala sa duha ug  human niini daling nangikyas apan nadakpan sa follow up operation sa kapolisan.

Si Espina miingon ang duha ka mga biktima nakabaton og daghang  samad nga pinusilan sa kalawasan  ug patay na pag-abot sa Danao District Hospital si Ryan.

Ang kapuyo niya nga si Madel gibalhin sa usa ka pribadong tambalanan sa dakbayan sa Sugbo.

Ang mga biktima adunay tulo pa ka gagmay nga mga anak . Hangtud ning pagsuwat sa balita wala pa masayri sa kapolisan ang hinungdan sa maong pagpamusil sanglit dili motubag ang mga suspek sa ilang mga pangutana. (/EIM) (BANAT NEWS)