Onse ka private schools sa CV mopasaka sa ilang tuition fees

CEBU, Philippines - Gikompirmar sa Department of Education-7 nga onse ka mga eskuylahan sa Central Visayas, duha niini sa Sugbo ang mopasaka sa ilang tuition fees sa school year 2014-2015.

Si Marcial Degamo, DePEd-7 Quality Assurance and Accountability Division chief miingon nga niadtong  Pebrero 27, 2014  dunay onse ka eskuylahan ang mi-file og petisyon  aron sila mopausbaw sa ilang tuition fees ug miscellaneous fees. Ang duha ka mga eskuylahan sa Sugbo nga mopasaka sa ilang tuition fees mao ang Sacred Heart School, nga nangayo og 10 percent tuition fee increase alang sa pre-school, elementary ug secondary level. Samtang ang Lahug Christian School nangayo usab og 10 porsiyentong tuition fee sa pre-school ug 15 percent sa elementary level.

Ang maong eskuylahan usab nangayo og 18.50 percent increase sa miscellaneous fees sa pre-school ug 18 percent sa elementary level. Apan wala mangayo og usbaw sa secondary level.

Matud pa ni Degamo duna karo’y 20 ka applications nga pending tungod kay wa pa makompleto ang ilang mga dokumento nga gisumitir.

Nagtuo si Degamo nga madugangan pa ning mosunod nga mga adlaw ang mangayo og usbaw sa matrikula.

Niadtong school year 2013 -2014  ang  DePEd-7 miaprubar sa aplikasyon sa 129 ka eskuylahan, 80 niini sa Cebu.  (BANAT NEWS)