Mister nasakpang dunay ‘chicks’ sa ilang kwarto
CEBU, Philippines - Maluibon nga bana gipapriso sa iyang asawa human ang nauna nasakpan sa akto sa iyang asawa nga dunay laing babayeng kuyog sa ilang kwarto.
Ang bana nga 34-anyos dugay nang giproblema sa iyang 25-anyos nga asawa tungod sa pagkahimabaye niini.
Tungod kay wa na makaagwanta sa pagluib sa iyang bana nagpatabang na siya sa kapolisan aron madakpan ang iyang bana.
Diha-diha, miresponde si PO1 Juanito Libres ug miadto sa balay sa magtiayon nga nahimutang sa Barangay Maguikay, Mandaue City.
Sa pag-abli nila sa kwarto sa magtiayon, nasakpan gyud sa akto ang bana nga dunay kuyog nga laing babaye. Wa hinuon ibutyag kun nag-unsa ang duha sa lawak.
Nakuha gikan sa kwarto ang usa ka posporo nga dunay sulod nga Marijuana, usa ka lighter, duha ka aluminum foil ug tulo ka linikit nga aluminum foil.
Kasong Concubinage kon pagluib sa iyang asawa ug RA 9165 kon ilegal nga paghupot sa ilegal nga drugas ang ipasaka sa duha. (Melissa Cabahug/USJR-Intern/EIM)(BANAT NEWS)
- Latest
