‘Drug pusher’ milugnot nakaikyas, 2 niya ka kauban nakuhaa’g shabu

CEBU, Philippines – Duha ka construction workers nadakpan sa mga polis ug nasakmitan sila’g daghang pakete sa shabu apan ang ilang usa ka kauban nakaikyas human milugnot pag-ayo gikan sa mga kamot sa kapolisan.

Ang mga nadakpan didto sa Barangay Yati, Liloan kaniadtong Biyernes sa gabii mao sila si Romil Acapulco, 20, ug si Bobby Basubas, 32. Mata’g usa kanila nasakmitan og ‘tag walo ka pakete nga shabu. Ang ilang kauban nga si Jonathan Villegas nasakmitan kini’g  20 ka pakete nga shabu aw ala pa kini makaikyas.

Si PO3 Jesson Gayo miingon nga nagpatrolya ang iyang mga kauban didto sa Sitio Bas, sakop sa Barangay Yati ug nasigpatan nila ang tulo ka lalaki.

Dihang nagkaduol na ang mga polis sa nahimutangan sa tulo, ilang nakita nga nagdali unta nga mobiya ang mga lalaki nga nakapaduda sa kapolisan. Naaghat ang kapolisan pagsita sa tulo ka lalaki dayon gipangrekisa ug nasakmitan nila kini og pinakete nga shabu.

Dihang posasan na unta sa mga polis ang tulo, si Villegas kalit nga miwakli sa kamot sa polis ug mikaratil pagdagan paingon sa ngitngit nga bahin ug malampusong nakaikyas. Ang duha ka dinakpan nga si Acapulco ug Basubas gitanggong karon sa bilanggoan ug pasakaan sila’g kaso sa piskaliya ugma, apil na ang nakaeskapo nga si Villegas. - /RUB (BANAT NEWS)