Hotel ug balay nasunog

CEBU, Philippines - Naglumba pagpang-gawas ang mga kawani ug guests sa Crown Regency Hotel diha sa Osmeña Boulevard, dakbayan sa Sugbo dihang nasunog ang usa ka kutson sa basement sa maong hotel kagahapon sa udto.

Si Cebu City Fire Marshal Rogelio Bongabong Jr.mibutyag sa mga tigbalita nga ang sunog nagsugod diha sa basement sa hotel ug ang giingong hinungdan niini ang foam nga diha duol sa generator set.

Ang foam gituohang higdaanan sa operator sa generator set kung duna kini kamangon sa ilawom sa makina.

Gawas niini nabantayan usab sa kabomberohan nga dunay nayabong gasolina diha sa sawog apan magpahigayon pa usab sila og imbestigasyon niini. Ang tagdumala sa hotel daling mipagawas sa mga kawani ug guests dihang mipuot ang bagang aso gikan sa basement hinuon walay gikatahong naangol sa maong hitabo.

Ang alarma sa sunog nadawat sa kabomberohan mga alas 12:30 sa udto ug human sa 10- minutos gideklara na kining under control ug mga ala una sa hapon nadeklarang total fire out. Gibana-banang mikabat ngadto sa P10 mil lang ang danyos sa sunog.

Usa ka balay nasunog tungod sa giingong pagduwa og posporo sa usa ka 5-anyos nga batang babaye kagahapon sa buntag diha sa barangay Upper Bogo, lungsod sa Argao.

Ang nasunog nga balay gipanag-iya nila ni Bonifacio ug Rosalinda Alcayde.

Si FO1 Diannah Dano sa Argao Fire Station miingon nga alas 9:40 nagsugod ang sunog apan nareport kini  alas 10:25 na ug ang kapolisan na maoy nagreport ngadto kanila.

Sumala ni Dano nga nagduwa og posporo ang 5-anyos nga apo sa magtiayong Alcayde ug dihang miulbo na ang kayo nidagan kini ug nagpatabang sa ilang mga silingan. Si Marilyn Mamac daling miluwas sa usa ka tuig nga apo sa magtiayon nga diha sulod sa balay dihang miulbo ang kalayo. Gibana-bana nga naabot ngadto sa P20 mil ang danyos sa maong sunog. (/BDB)(BANAT NEWS)