PROBE wala na manakmit og mga ATM sa aseras

CEBU, Philippines - Gikalimtan na sa mga sakop sa Prevention Restoration Order Beautification Enhancement (PROBE) ang paghimo’g kampanya batok sa mga Automated Tubig Machines (ATM) nga anaa ra giladlad sa mga aseras nga wala’y nagbantay. Ang mga sakop sa PROBE sa Cebu City Hall maoy gitahasan pagpangsakmit sa mga ATM nga giladlad ra sa aseras nga nakahatag og kapilegro sa mga tawo nga makainom unya og tubig nga mahimong mahugawan sa mga tawo nga bilyako.

Ang kadagkoan sa Cebu City Health Department daan na nga miawhag sa mga opisyal sa dakbayan sa Sugbo nga dili gayud itugot nga ang mga Automated Tubig Machines anha lang iladlad sa aseras.

Dihang gihimo sa PROBE ang kampanya sa hinapos nga bahin sa miaging tuig, daghang water vending machines ang nasakmit ug gipamulta ang mga tag-iya tungod sa paggamit sa aseras sa ilang negosyo.

Nabantayan hinoon sa Banat News nga sa milabay’ng mga buwan gipasagdan na lang sa PROBE ang pagpamutang og water vending machines diha sa aseras.

Mga opisyal sa City Health Department nabalaka nga kun anha sa aseras lang ibutang ang mga water vending machines mahimo kini nga butangan og hugaw sa mga badlongon ang agasanan sa tubig  ug makainom og hugaw ang publiko. (BANAT NEWS)