Drayber nga way training dili na tugotan pag-drive

CEBU, Philippines - Ang kadagkoan sa Land Transportation Franchising and Regulatory Board (LTFRB) ingon man ang Land Transportation Office (LTO) estrikto na nga mopatuman nga ang mga drayber og public utility vehicles nga kuwang sa “training” dili na tugotan nga makamaneho.

Mao kini ang gitataw nila ni LTFRB-7 Regional Director Ahmed Cuizon ug LTO-7 Regional Director Arnel Tancinco human nila gipirmahan ang usa ka kasabutan.

Gipasabot sa duha ka opisyal nga ang mga drayber sa PUV’s kinahanglang mo-undergo gayud og pagbansay-bansay bisan og dugay na sila nga nagmaneho og sakyanan.

Ang kadagkoan sa LTFRB ug LTO maoy modumala sa training ngadto sa mga drayber og mga PUV’s aron masiguro nga makahibawo sila sa mga angayang buhaton ug ang mga butang nga angayan likayan sa pagmaneho og sakyanan sa kadalanan.

Matud ni Cuizon ug Tancinco nga ang nag-unang katuyuan sa pagpa-undergo og training sa mga PUV drivers gitumong aron nga malikayan ang sunod-sunod nga trahedya sa bus.

Ang mga pinili nga sakop sa LTFRB-7 motambong og seminar karong petsa 21 ug 22 adto sa Batangas aron bansay sila nga mopahigayon sa pagtudlo sa mga drayber.

Ang pagpatuman sa seminar ipatuman tibuok nasud.  (BANAT NEWS)