Tigpanakop sa magpataka’g labay og basura seminaron
CEBU, Philippines - Ang dul-an sa 400 ka sakop sa City Environmental Sanitation and Enforcement Team (CESET) ug Barangay Environmental Officers (BEO) nga gitahasan pagdakup sa magpataka’g labay sa mga basura patambongon og seminar aron tudloan unsaon nga epektibo sila sa ilang trabaho.
Si Konsehal Nida Cabrera, ang tsirman sa Committee on Environment sa Cebu City Council, misugyot nga ang P456 mil nga magasto sa pagpahigayon sa seminar adto kuhaon sa Pagcor Funds.
Ang bag-ong hepe sa Department of Public Services (DPS) nga si Engr. Rolando Ardoza nagtinguha nga hingusgan na g’yud ang paghimo’g kampanya batok sa mga tawo nga magpataka lang sa pagpanglabay sa ilang mga basura.
Duna gani sugyot nga ang mga sakop sa CESET ug BEO tahasan usab sa pagpanglimpyo ug dili lang kay ang ilang trabaho mao ra ang pagpanakop.
Mata’g barangay gibutangan og lima ka BEO nga manakop sa mga masakpang magpataka paglabay sa ilang sagbot sa publiko nga lugar, sama sa daplin sa karsada.
Si Konsehal Philip Zafra nga kapitan sa Barangay Tisa ug ex-officio member sa City Council isip presidente sa Association of Barangay Councils (ABC) nagplano nga lahugayon ang mga BEO sa pagdistino.
Giangkon ni Zafra nga dunay mga BEO nga magpangikog sa pagdakop sa mga makahimo og kalapasan sa balaud kun kini ilang mga kaila.
Matud ni Zafra nga kahatagan kini og sulbad kun ang mga BEO sa usa ka barangay adto idistino sa laing mga barangay aron dili sila maikog nga modakop sa dili nila kaila. (BANAT NEWS)
- Latest
