Patrolcar gibato sa wa pa gipamusil ang upat

CEBU, Philippines - Pamilya sa upat ka lalaki nga gipamusil sa lungsod sa Balamban nasagmuyo sa kapolisan.

Si Cristajel Estan iyaan og ig-agaw sa biktima nga si Rhembran ug Clint Estan miingon nga human sa pagpamusil igo lang miadto sa crime scene ang mga polis ug namunit sa bala og wala mangimbestigar.

Apan wala hinuon mibutyag si Cristajel Estan kung kinsa nga polis ang miadto sa crime scene.

Midugang si Cristajel nga sa wala pa ang maong hitabo mitubag sa alarma ang kapolisan tungod kay may nag-away nga magtiayon nga ilang silingan.

Matud ni Estan nga pag-abot sa patrol car sa kapolisan sa Balamban naalibwag ang mga batan-on nga nagduwa og bolitsi sa kilid sa dalan.

Apan matud niya nga may milabay og bato sa patrol car hinungdan nga mipadagan kini balik sa police station.

Gani dugang ni Cristajel nga gipunit pa sa polis nga luwan sa maong patrolcar ang bato nga gigamit sa paglabay sa patrol car.

Mitug-an si Cristajel sa mga ngalan sa duha ka polis nga sakay sa maong patrolcar apan gipugngan una sa Banat News samtang wala pa sila kakuhai og pamahayag.

Sumala pa ni Cristajel nga paglabay sa 40- minutos human sa maong hitabo duha ka lalaking nagsakay og motor ang miabot ug mikanaog ang angkas niini og nangutana sa mga ngalan sa naglingkod sa payag-payag daplin sa dalan dayong pusil sa tulo ka lalaki.

 Dugang pa niini nga natagak sa iyang gilingkoran si Toong ug nidagan  si Rhembran nga samdan  sa iyang tiil apan gipusil pa gihapon kini apan nakaabot pa kini sa ilang balay.

Sumala pa ni Cristajel nga ang mga polis nga miresponde sa lugar igo rang namunit sa mga kabhang sa bala og wala na gyud sila nipahigayon og imbestigasyon.

Naglibog si Cristajel nganong ang mga mipusil sa mga biktima nangutana pa man kung kinsa ang naglabay og bato sa patrol car.  (Bryner Diaz/EIM

Diskwento sa MCWD sa sayo mobayad gipahunong

Ang mga konsumidor sa Metropolitan Cebu Water District (MCWD) nga mokonsumo og ubos sa 50 cubic meters sugod niining buwana dili na makapahimulos sa singko porsyento nga diskwento.

Sa advisory sa MCWD diha sa ilang consumer’s bill nagkanayon kini nga ang bag-ong discount scheme mo-epekto kini sa due date ubos sa mosunod nga buwan sa Pebrero, 2014.

Sayo pa ang MCWD mipahibalo nga sugod sa Enero 1, 2014 ang bag-ong discount scheme ipatuman puli sa singko porsyento nga discount alang sa mga on-time payment.

 Kahinumduman nga ang MCWD, mihatag og singko porsyento nga discount sa makabayad sa ilang balayranan nga dili molapas sa “due date” bisan og pila ang makonsumo sa konsumidor.

Sukad niadtong tuig 2006 ang MCWD mihatag og singko porsyentong diskwento, apan karon, ang mga konsumidor lang nga mokonsumo og lapas sa 50 cubic meters maoy hatagan og diskwento.

Dugang niini nga ang discount ma-apply lang ngadto sa consumer’s water fee ug walay labot ang Power Cost Adjustment, Purchased Water Adjustment ug franchise tax. (BANAT NEWS)