2 nadakpan, usa dunay shabu ang usa armas

CEBU, Philippines - Nadakpan sa kapolisan sa Toledo ang duha ka tawo, ang usa nasakmitan og mga paketeng shabu samtang ang laing dinakpan nakuhaan usab og armas.

Ang nasikop sa team nga gipangulohan ni Chief Inspector Michael Anthony Bastes, hepe sa Toledo Police Station, mao sila si Raul Malasaba, 28, taga Sitio Lawis, Barangay Luray II, ug si Jovito Mag-azing, 41, taga Sitio Silangan, Barangay Cantabaco, pulos sakop sa Toledo.

Gitanggong karon sa bilanggoan sa Toledo si Malasaba kay nasakpan g’yud siya nila ni Bastes nga naghingos og shabu sulod sa usa ka panimalay sa Sitio Lawis kagahapon sa udto.

Si PO3 Salvador Samillano, duty desk officer sa Toledo City Police Station, miingon nga si Bastes ug pipila ka polis nagpahigayon og follow-up operation didto sa Sitio Lawis kabahin sa usa ka pagpangawat kinsa usa ka Taiwanese national ang gikawatan og bisekleta.

Matud ni Samillano nga dikit-dikit ang balay sa Sitio Lawis ug pag-agi nila ni Bastes ilang nalantawan sa bentana si Malasaba nga giingong paingon na untang mohingos og shabu.

Human dakpa nila ni Bastes si Malasaba nakuhaan pa kini og dugang tulo ka paketeng shabu, duha ka improvised plastic funnel ug duha ka linikit nga aluminum foil nga kagamitan paghingos sa aso gikan sa shabu.

Samtang si Mag-azing nasakmitan og 357 Magnum revolver ug upat ka bala, apan kalibre .38.

Ang mga polis nga nakadakop ni Mag-azing miresponde ra unta sa Sitio Silangan aron pag-follow up sa usa ka kawat apan may mitaho nga dunay armado’ng tawo sa unahan mao nga dali nila kini nga giadto.

Wala makapakita og lisensya sa armas si Mag-azing mao nga gitanggong siya sa kapolisan.  (BANAT NEWS)