Honorarium sa mga BEIs ug BOC sa Mandaue City wa pa mahatag

CEBU, Philippines - Maglima na ka buwan ang nakalabay human sa barangay elections apan ang kapin usa ka libo ka magtutudlo sa Mandaue City nga miserbisyo sa maong piniliay wa pa gihapon makadawat sa ilang honorarium nga dul-an lang sa P200.

Matud pa nga mireklamo ang pipila ka mga magtutudlo nga nagtudlo sa Umapad Elementary School nga nagsilbing board of election tellers ug board of canvassers ngadto ni Umapad Barangay Kapitan Nelson Rubio kun nganong hangtud karon wa pa sila makadawat sa ilang honorarium. Si Atty. Ann Fleur Gujilde nga maoy Comelec election officer sa maong dakbayan nga nahinabi sa Banat News mipasabot nga maong nalangan ang paghatag niini tungod kay gigamyan siya sa dawatunon sa matag magtutudlo ug buot niyang padugangan pa kini sa siyudad.

 Matud pa ni Gujilde nga ang P10,000 nga kontribusyon sa matag barangay gikan sa 27 ka barangay sa dakbayan niadtong Oktubre 28 ,2013 barangay elections  muabot lang og P270,000.

Kun kini bahinon sa 1,551 ka mga magtutudlo nga miserbisyo nianang adlawa kapin lang sa P100 o P174 lang ilang makuha kada usa. Gihangyo karon ni Gujilde si Mayor Jonas Cortes nga dugangan ang maong kantidad ug matud pa misanong kini ug gusto niining isirado tagsa ka libo ka pesos ang kada usa.

Sumala pa ni Gujilde nga iapil unta kini sa bag-ohay lang gipasar nga supplemental budget sa siyudad karong tuiga apan nakasinati kini og kakulian sa pagsumitir ngadto sa Commission on Audit hinungdan nga gibalik kini sa konseho aron kurihian una pa kini aprubahan. (BANAT NEWS)