Kanhi kapitan sa Day-as gikiha

CEBU, Philippines - Gipasakaan og kaso didto sa Ombudsman ang kanhi kapitan sa Barangay Day-as, dakbayan sa Sugbo kay giingong nagpadayon paggamit sa service vehicle sa barangay nga wala na siya sa katungdanan.

Gawas ni kanhi kapitan Rey Ellery Cañada, ang numero uno nga konsehal sa Day-as nga si Marilyn Bernal giapil usab sa pagkiha tungod kay ang sakyanan nga Toyota Hilux Plate No. SKV-439 giisyu ngadto kaniya. Usa ka lumolupyo sa Barangay Day-as nga si Roberto Espina mipirma og “affidavit” nga bisan og ang sakyanan tua na giisyu kang Bernal apan padayon kining gigamit ni Cañada.

Si Engr. Dionesio Gualiza nga maoy hepe sa General Service Office (GSO) miingon nga dihang iyang gipasusi sa iyang mga sakop nakit-an g’yud nga ang kanhi kapitan mao gihapon ang migamit sa sakyanan.

Gani ang sakyanan kanunay’ng makita nga adto mag-parking duol sa balay ni Cañada, dumadapig sa Team Rama. Ang bag-ong kapitan sa Day-as usa ka alyado sa Bando Osmeña Pundok-Kauswagan (BOPK).

Matud sa abogado ni Espina nga ang gihimo ni Cañada ug Bernal dakung kalapasan sa Anti-Graft and Corrupt Practices Act.

Si Cañada miingon nga giuli na unta niya ang maong sakyanan apan wala dawata sa midaug nga kapitan. Si Day-as Barangay Kapitan Jerome Puerto hinoon mipadala na og suwat ni Mayor Michael Rama aron matagad kining maong reklamo.  (BANAT NEWS)