Cyber porn ‘call center’ gironda

CEBU, Philippines - Napuhag sa kapolisan ang usa ka gidudahang cyber porn call center nga nag-operate sa dakbayan sa Sugbo nga nagtakoban isip usa ka kompaniya sa call center sa  Barangay Guadalupe sa dakbayan sa Sugbo pasado alas 2:00 kaniadtong Sabado sa hapon.

Matud ni Sr. Insp. Michael Vertudazo, ang hepe sa Anti-Cyber Crime Group nga nahinabi sa Banat News gipa-ubos nila sa surveillance ang maong buhatan sukad pa niadtong Nobiyembre sa miaging tuig.

Si Vertudazo nagkanayon nga gipanag-iya ang maong kompanya sa usa ka Chinese national ug nagtakoban kini nga usa ka call center company.

Matud pa ni Vertudazo nga nasikop ng Chinese national uban sa manager sa maong kompaniya dihang gironda sa kapolisan ang maong buhatan.

Sumala ni Vertudazo nga modus sa maong sindikato nga mang-recruit og mga gwapa nga models ug i-post sa internet ang ilang mga nawong.

Dugang ni Vertudazo nga adto sa usa ka website i-post ang maong mga litrato ug mga langyaw ang ilang mga customer. Matud pa sa opisyal nga mopalit og online credits ang maong mga langyaw sa dili pa kini maka-chat sa mga gituohan nilang model, apan lahi diay ang makig-chat kanila.

“Ang ubang foreigners gusto lang og sexual conversation ug nude conversation,” matud pa ni Vertudazo.

Matud pa ang ubang mga langyaw mo-offer nga makigminyo, o moari sa nasod aron sa pagpakighilawas, apan matud pa ni Vertudazo nga laing tawo na ang ipakita nila kun dili ang mga models mismo.

Na-rescue sa mga sakop sa PNP Anti-Cybercrime Group Region 7 ang 13 ka tawo sa maong operasyon, pito kanila mga babaye.

“Ang mga na-rescue nato nahimo na silang complaining witnesses kay cooperative man sila,” dugang ni Vertudazo.          

Pasakaan og kasong kalapasan sa RA 10364 o ang Expanded Anti-Trafficking in Persons Act ang mga suspek karong adlawa.