Drayber sa habal-habal gipatay sa mga carnappers

CEBU, Philippines - Patay ang usa ka habal-habal drayber human kini gipusil sa iyang pasahero unya mikuha pa gyud sa motor nga gimaneho niini pasado alas 12: 00 sa miaging gabii sa barangay Sabang sa lungsod sa Sibonga. Ang biktima naila nga si Emmanuel Lopez, 33, taga Sitio Talo-ot, Poblacion sa lungsod sa Sibonga.

Si PO3 Dandie Mulo, usa sa mga nag follow-up sa maong kaso miingon nga sa wala pa mahitabo ang pagpatay may usa ka lalaki nga miduol niini aron magpahatod sa dakbayan sa Carcar.

Matud pa nga gipakuha sa iyang gikasabot ang usa ka lalaki didto sa barangay Bahay sa maong lungsod ug miangkas kanila.

Apan dihang padulong na sila sa dakbayan sa Carcar gipahunong ang maong drayber ug gipakanaog sa motor.

Sumala pa ni Mulo nga misukol ang biktima tungod kay dako man kini og lawas ug matud pa nga gagmay og lawas ang iyang mga pasahero, apan gilupig kini sa duha.

Matud pa nga natagak sa iyang motor ang biktima dihang gisukmag niya ang usa sa mga tulisan, ug diha na nakahigayon ang usa sa mga tulisan pagdul-it pagpusil sa bukobuko niini.

Gidala sa Dr. Deiparine Medical Clinic ang biktima apan gideklarar kini nga dead on arrival ni Dr. Berlyn Sabal Latif.

Matud pa ni Mulo nga ilang gipaladman ang imbistigasyon sa maong kaso sanglit miingon ang kauban nga drayber sa habal-habal sa biktima ug ang kaliwat niini nga di gyud kini magpasakay og dili niya kaila. Apan gitutokan nga anggulo sa kapolisan sa lungsod sa Sibonga mao ang carnapping  ug ang kamatayon sa biktima. (BANAT NEWS)