Tag P2 mil nga financial assistance alang sa mga seniors ipanghatag na

CEBU, Philippines - Ang ‘tag P2,000 nga balanse ngadto sa matag senior citizen dinhi sa dakbayan sa Sugbo ipanghatag na ngadto kanila karong sunod semana kun mabalik na si Mayor Michael Rama gikan sa iyang pagbakasyon.

Mao kini ang gibutyag ni City Treasurer Diwa Cuevas kinsa mitug-an nga gihikay na nila ang mga gikinahanglang dukomento alang sa paghatag sa mao nga cash assistance.

Kapin sa 60,000 ka senior citizens ang makapahimulos sa mao nga cash assistance gikan sa kagamhanan sa dakbayan sa Sugbo nga maoy mokompleto sa P10,000 nga cash assistance nga gisaad sa mayor sa miaging tuig. Ang dakbayan sa Sugbo mogasto og dili mominus P120 milyones aron mahatag ang ‘tag P2,000 sa kapin sa 60,000 ka senior citizens sa dakbayan.

Samtang wala pa mahibaw-i kun kanus-a masugdi sa paghatag ang cash assistance sa mga senior citizens para karong tuiga.

Matud ni Cuevas nga magpaabot sila sa kamandoan sa mayor kun kanus-a sugdan sa pag-release ang cash assistance sa mga senior citizen niining tuig 2014.

Gipahibalo na ni Mayor Rama nga matag senior citizens hatagan lang og P6,000 gawas lang kun adunay dakong kantidad nga makolekta ang dakbayan.

 Apan si Konsehal Margarita “Margot” Osmeña miingon nga walay rason nga dili ihatag ni Rama ang gisaad kaniadto nga tag P12,000 na nga cash assistance sa mga senior kay wala nila giibanan ang gahin nga P720 milyones alang niini. (BANAT NEWS)